AAA

POLITIKA | 13.10.2017 11:35

Dikhljaripe e nevipengo vaš 13. oktobri 2017. ko 12 00h

BEOGRAD  -  Arakhibasko e dizutnengo o Zoran Pašalić vakarga kaj situacia kotar peravibe e objektengo ani Savamala ano akava momenti ano vasta e policiake, daviutnipaske thaj kriseske thaj adžukarelape kaj e policia ka adikarolpe prekal situacia savi sine.

O Pašalić an intervju vaš kurkesko lil Novi magazin vakarga kaj pana e 19. februarea odoja stiaucia kotar pozicia arakhibaske dženoski arhivirimi, leline siton sa vastušea save sine numa odoje publikake rodipasko vaš dudljaripe savo šaj te dikholpe ano nekobor forme.

Ano pučipe ka ovol mi palo so policia agorisinela e buti, prekal eroibe e dženengo save sinolen škodra, o Pašalić denga pozitivno djevapi.

BEOGRAD  -  Prezidento e Sribako o Aleksandar Vučić vakarga e generalno sekretarea Norisko konsilesko e ministresko Dagfin Hejbrotenea kotar anglalipe e nordisko modelesko e zorale regionalne maškaribasko, sar ini kotar šajipe ano odola forme te ovol sar misal e Rjaćutne Balkaneske.  

Sar vakardo ano mothovdipe, o Hejbroten vakarga kaj nordisko phuvja, sar ini tikne pedo gendo e diztunengo, pindžarde anglalipe e khupatnipasko thaj kaj ini sajekh na sine loke, arakhlje forme te keren ulavdo niveli e integraciako thaj prekalsamatrendako mobilnost, savo kerga forme vaš baro ekonomiako barjaripe.
ov vakarga kaj odola empirie ka oven ulavde e Rjaćutne Balkanea, vakeriba kaj paše ekonomiako anglalipe, nordisko modeli e maškaribasko angja ini dži baro paćiv maškar o themia.  
 
BEOGRAD  -  Thagarutni Srbiaki anavga redaktori «Ilustruima politikako» Aleksandar Gajović vaš raštrako sekretari vaš informišibe, mothavdo kotar Amalipe e žurnalistengo Srbia.

UNS haljovela kaj o Gajović anavdo ano bešipe e Thagarutnako Srbia.

Ano mothovdipe kotar UNS vakardo kaj o Gajović sine jekh berš sar turvinutno ano sektori e informišiasko e Ministribasko kulturako thaj informišibasko a lela kotor ini ano hrmaibe e mediske kanunengo. Ano septembri ko 2013. Dikhipasko šerutnipe «Politikako» anavga ole vaš angluno thaj djevaptuno redaktori e lilesko «Ilustruimi politika».

BEOGRAD  -  Akti e ažutipasko vaš formiribe e Themutna strankako, savu angle vakarga o Vuk Jeremić, hraminde pobut e 70 publikake persone, advokatia, doktoria thaj nakhle ambasadoria, hraminela lil Danas e paraštujesko 13. oktobarea.

Prekal bioficielno haljovibe e lilesko, o dizutne e Srbiake ano kaske štandia ano pobre dizja e savatosta, 14. oktobarea šaj te hraminen Akti vaš ažutipe.

Ano Akti vakardo kaj e Srbia nakhela prekal bari moralno, amalipaski, ekonomiaki thaj politikaki kriza, tehnološko thaj ekonomia ačhola vaš phuvja ano pašipe thaj lumia, thaj kaj «čorolipe thaj bijpheribe e perspektivako prezentuinela klidutne problemia e amalipaske».

BEOGRAD  -  Ambasadori KAR ani Srbia o Kajl Skot pučla soske došalutne  vaš marebasko mudaripe ano Balkani khere dikhenape sar herojia, mothavela lil Danas e paraštujesko. «Me sim ambasadori e Khedutne Raštrengo ani Srbia, a na ani Hrvatska, numa ini odova nakhela kotar šukar pučipe savo ašungum ani akaja phuv: soske došalutne vaš marebasko mudaripe ano akava regioni khere dikhenape sar herojia», vakarga o Skot.

Ov vakarga kaj rudjisardo te dol komentari kotar phenibe e ministresko arakhibasko Srbiako Aleksandar Vulin kaj biadžukardo so ambasadori KAR «na dikhela imidžti e hrvatskaka raštrako» odolea so hagesko došalutno Ante Gotovina sito turvinutno ani Thagarutni Hrvatska.

BEOGRAD  -  Direktori e Kancelariako e Thagarutnako Srbia vaš Kosovo, o Marko Djurić vakarga kaj Beogradi sito gatisardo vaš lundjaripe e dijalogesko e Priština thaj vaš reslibe sa bijekhpasko thaj problemesko e srbikane themesko ano Kosovo tehno thaj demokratikane vastušea.  

Ano bešipe e raštrake sekretarea Ministribasko avrune bukengo Sloveniako Andrej Logarea, o Djurić vakarga kaj e Srbia, numa masekenca nanola partneri vaš realizuibe e Briseleske haljovibasko, ulavde sar angluno elementi Khupatna srbikane komunengi ano Kosovo.
 
PREŠEVO  -  Komuna Preševo ka lol anglo jekvhakteske lokalno alosaribe pana jekoh partia Miškope vaš reforme e Demokratikana partiako Albancjengi, savi ka ovol klidutno faktori ani odoja lokalno kokorodirekcia, vakarga ano žoj prezidento e formiribaske šerutnipasko odola partiako o Sami Salihu.

O Salihu savo ano palune lokalno alosaribe 2016. lela kotor sar funkcioneri Demokratikana partiako Albancjengo, kasko lideri sito o Ragmi Mustafa, vakarga vaš agencia Beta kaj adžukarela kaj Miškope vaš reforme e DPA anglovakteske lokalno alosaribe ka lol paćiv e majbare gendoske alosardutnengo thaj kaj ano avutnipe ka legarol komuna.


Produkcia e finansienca ažutinga o Ministribe e kulturako thaj informišibasko e Republikako Srbia. Nevipe vakardo ani akaja produkcia na sikavela bahamia thaj adikaribe e instituciako savi denga ažutipe e finansienca.

KOMENTARI

Broj komentara : 0

Vaše ime*


Vaš e-mail


Vaš komentar*



otkucano 0 od ukupno 1500 karaktera.